8

النهردة اكتشفت حاجة مهمة
من احد اسباب فشل الدايت
او التمسك الشديد بالحلوى والشيكولا هي الخوف
ايوة الخوف
الخوف من الحرمان
انا خايفة احس اني محرومة
:((

7

امبارح والنهردة اكلت كل الشوكوللاته اللي في الدنيا
ومفيش حاجة اتغيرت
مفيش تحسن مفيش فايدة
ملعوون ابو الاكل على ابو الشوكولاته على كل حاجة

5

النهردة
المفروض ابتدي ريجيم البطاطس المسلوقة
6 ايام متتالية لا شيء فيها سوى البطاطس
اعتقد ان الفشل متوقع سريعا جدا المرة دي
معنديش امل بصراحة اني هقدر اكمل

4

اليوم اشعر انه لا فائدة
سنبدأ من جديد
منتهى  الاحباط

3

اليوم السادس بدون شوكولاته كده اوففر بقا

وسقف المطالب كمان بدأ يعلا

يعني ممكن اول يومين يعدوا كويس بعد كده االواحد بيبدأ يتأكد انو اتحبس فعلا وانو لازم يتخلص من القيود اللي حواليه

اه الدايت احد القيود برضو

وعشان الواحد يتخلص من القيود دي فقدامه حل من اتنين يا إما يشغل نقسه بجد ف اي حاجة ياإما يضعف بقا ويلخبط الدنيا وخلاص

وطبعا الحل التاني ده اسهل بكتير وخصوصا اننا زي ما قلنا في البوست اللي فات  الخطأ دايما بيجي كده على غفلة 

النهردة مكنش فيه خساير كتير زي امبارح 

النهردة بدأت قراية في كتاب لا تحزن لعائض القرني 

هو الكتاب مفيهوش كلام جديد يعني بس احيانا البني ادم مننا بيحتاج انو يسمع الكلام او يقراه تاني ساعات ممكن يجيب تأثيره بس في المرة العاشرة 

على فكرة هو لازم الواحد يحاول يضيف حاجات جديدة ممتعة لحياته علشان تحل محل الحاجة الممتعه التانية اللي بنسحبها منه

امبارح مثلا عملت حاجة عبيطة بس غيرت مودي تماما كلمت طفل معرفوش في الشارع وقعد يوريني الاستيكرات اللي اشتراها من المكتبة وبعدين مشي معايا لحد بيته وروح 

لذيذة الفكرة بتفكرني بالاعلان بتاع اتجنن وعيش للناااااس

الموسيقى بتاعة الاعلان ده دمار بتخلي الواحد خلاص هيخرم السقف

انا فعلا نفسي اتجنن واعمل حاجات كتيير اوي

اهمها اني نفسي اغني وارقص مرة في الشارع وبعدها اطلع واطير من فوق الناس وهما يفضلوا باصين عليا وانا بطير فوقهم وببعد.وببعد...وببعد....

2

النهردة رابع يوم في الرجيم واول يوم في الفشل
المشكلة اني عملت كيكة وعلملتلها كريمة بطعم الفراولة وكانت تحفة طبعا
الغريب ان الواحد مش بيفكر قبل ما بياكل
فجأة كده بيكتشف انه اكل وبوظ كل حاجة كانه كان متخدر أو غايب شوية عن الوعي
وهو البني ادم غالبا لما بيغلط بيبقا في حالة شبه كده
فجأة كده بيلاقي نفسه غلط , فجأة كده بيلاقي نفسه ارتكب ذنوب مكانش متخيل انه يرتكبها
واضح ان اول قاعدة هنكتشفها للقدرة على المتابعة هي الحفاظ على اليقظة والحذر طوال الوقت
الحذر لن يكون من اي حد غير من نفسنا
واضح كمان ان الدايت ده مش في الاكل بس
القواعد والبرامج الصارمة بنحطها لنفسنا لو عاوزين نحقق اي حاجة ولو حتى في الحب مش ساعات في واحد عشان يلفت واحدة او حتى يوقعها في الحب بيحط لنفسه خطة ونظام معين يمشي عليه
يمكن المشكلة اني مش منظمة واني عمري ما خططت لحاجة قبل ما اعملها كل حاجة بعملها بمجرد ما بحسها
بس هو اكيد ده مش مبرر
عشان الواحد لو حب يدورعلى مبرر لاي غلط بيعمله هيخلق 100 مبرر
الوضح ان من اول خطوات النجاح الا نبحث عن مبررات

1

اول يوم في الرجيم الجديد اللي مش عارفة رقمه طبعا
المرة دي كمان ابتديته وانا صايمة
قررت ابتدي بداية جديدة
كل يوم هكتب الحاجات اللي نفسي اكلها ومش هاكلها عشان ابقا اجمعهم كلهم واكلهم في اليوم الفري
النهردة مش ليا نفس للشوكولاته بس ليا مزاج في كيس شيبسي
شيبسي بس مش جاي على بالي حاجة تانية
فكرت ان انا لما اكتب الحاجات اللي ببقا نفسي فيها كل يوم لحد ما اشوف بمرور الوقت الحاجات هتزيد والا هتقل
فكرة الدايت اصلا فكرة رخمة
فكرة انك تحرم نفسك بمزاجك وتجبرها تمشي على نظام هيا مش عاوزاه وخصوصا لو نفسك دي متمردة وعصبية ومجنونة زيي
بس مفيش مشكلة من اعادة المحاولات
اكيد في مرة هنوصل مهو اعادة المحاولات هتخلي اكيد مرة تنجح
مهو اتضح اننا في الدنيا عموما مش بناخد كل اللي احنا عاوزينه واننا ممكن برضو نحرم نفسنا بالاجبار من اكتر حاجات بنحبها وبنكمل وبننجح
اتاري ده جزء من فلسفة الحياة اصلا ان الواحد لو اخد كل اللي هيا عاوزه مش هتبقا حياة
هو صعب انك تتحرم من حاجات بتحبها لكن اكيد الاصعب واللي بيختبر قوتك انك انت اللي تحرم نفسك بإيدك
وكنوع من انواع التغيير او احد محاولات مساعدة النفس فكرت اني اكتب كل يوم عن الحرمان في احد ابسط صوره وهي الحرمان من الاكل